Cosplay角色扮演是由日本傳入已久的玩意,其目的是透過各種度身製作的衣服、道俱、飾物,模仿出與目標漫畫、動畫人物相同的外形、外貌,直接的來說就是要將這些虛構世界的故事和人物,活靈活現的帶到現實生活之中,從單純文字和圖畫發展出另一種樂趣。Cosply這個合併詞彙,就是包含著Costume與play的意思,即一種服裝和玩樂結合的玩意。
為了更加深入了解香港本土的Cosplay文化,MADEinHK邀請了幾位在自Play More的朋友接受訪問(Play more是一個以Cosplay及相關活動為主題的網站,其會員之中包括有Cosplayer及喜歡攝影朋友等等)。當中的聯絡及發起人阿深,本身是有開設及提供Cosplay服裝訂製及租借的,亦層於本土的漫畫節中開創服裝租借,讓即場興起的朋友可參與活動,此行的一些朋友們亦是從此途徑結識得的。
H:Herbert
深:阿深
月:月雪
數:數碼子
昕:阿昕
翼:阿翼(攝影興趣者,負責Play more的攝影)
S:Sonny
K:Kenny
好:好小子
當:丫當
豬:豬古狗
H:日本動漫(動畫或漫畫)入侵香港己有一段很長的時間,請問佢有啲咩吸引到你地嘅地方呢?自己又點解會對Cosplay依個玩意產生興趣?
深:我大約係中一嘅時間已經開始睇日本動漫,初時覺得電視所播嘅卡通節目好低B,但當接觸到依啲日本嘅動漫之後又覺得好OK喎!幾好睇喎!從此之後就愛上佢,若然真正鐘意動漫嘅話自然會留意到佢嘅週邊事物,例如Game、玩俱,後來係一次動漫節就接觸到Cosplay依個活動,漸漸自己亦都對依個玩意產生興趣!
月:我係喺中學中一嘅時候,透過身邊嘅朋友接觸日本漫畫,我記得當時我睇嘅第一套漫畫係不思異遊戲,睇完漫畫之後煲動畫囉!日本動漫吸引嘅地方係基於佢地嘅故事內容,因為香港可以接觸到嘅都係啲龍虎門果類,佢地非常之唔啱我睇!
翼:我自己本身好細個已經接觸動漫,大概五歲咁上下,我諗第一部接觸嘅動畫就係Gundam,當時係無線播放嘅,好記得裏面有部Z高達!香港嘅漫畫其實係比較商業化,日本嘅除咗商業以外你會見到一種熱誠,而且香港漫畫嘅畫風我亦唔係太接受。再者,日本漫畫嘅劇情比較特別啲囉,唔會話好估到佢講咩,香港嘅漫畫泥泥去去都係果啲劇情,純粹為商業去做,依個亦係我唔鐘意香港漫畫嘅原因之一,相對泥講日本漫畫嘅商品比較多,而且做得靚,依種係另一種樂趣,好自然吸引咗我。
K:其實香港漫畫亦都吸引到我,我自己都有睇開龍虎門嘅,其實佢嘅劇情都幾特別。日本漫畫我亦係好細個就接觸到,而且好多六十年代嘅我都有睇,例如鐵甲萬能俠我都接觸過,咁當然係之後番睇喇,我咁後生得十五歲!若果你話瘋狂買漫畫嘅話,都係由兩三年前開始,果時狂追好多漫畫,到依家都係追番二三本,都係啲比較大熱嘅。吸引到我嘅都係一啲冒險、爆笑,例如蠟筆小新果類,真係百看不厭,冒險類依正如狐忍之類喇!不過最鐘意都係犬夜叉!
當:其實我由細到大都鐘意睇細到大都鐘意睇動畫嘅,而依吸引到我通常都係一啲感動嘅漫畫,一套真正感動嘅動畫真係會令到人喊,而當然開心嘅動畫亦都可以令到你笑,會好開心m因為我鐘意依種感覺,所以我一直都有追動畫。
好:我睇嘅第一套動畫應該係熱血最強,佢令影響咗我依十八年睇動畫嘅風格睇,主要都係圍繞一種熱血嘅機械人故事,例如勇者系列嘅勇者皇。由於依幾年日本果邊開始走向一個惡搞化現象,咁我自己亦睇多咗依一類嘅動畫,例如Lucky Star、旋風管家、瀨戶之花甲。不過咁唔代表我唔會睇番一啲復古動畫嘅,例如六七十年代嘅變形金剛,同埋日本改篇自美國嘅動畫。
H:我想問下你玩Cosplay時,係純粹享受置身漫畫世界嘅感覺,還係單純咁借Cosplay依個活動去著自己喜歡嘅服飾?從時裝嘅角度出發?
月:兩樣都有囉,而你第一次Cosplay嘅時候,多數都係同埋啲friend一齊出一啲角色,例如一套漫畫咁樣,你玩耐咗之後就會發覺,可以同一班志同道合一齊玩一樣自己鐘意嘅野係一件好開心嘅事,主要係享受依個過程多過其它。
昕:我同小月一樣,都係兩樣都鐘意嘅,因為當你鐘意一個角色嘅時候就好自己會鐘意埋佢嘅服裝,我覺同時可以算係時裝嘅一部份,但我地就好清楚自己主要係想演好個角色,而唔只係從fashion出發。
翼:我自己本身唔係Cosplayer,我係攝影師,所以依條我無嘢回應。
S:我自己本身的確係為咗置身漫畫嘅感覺而玩Cosplay嘅,對於我自己嚟講Cosplay同漫畫嘅關可以形容為,你鐘意果套漫畫自然會鐘裏面嘅人物,亦好自然想去試下演繹裏面嘅人物角色,了親身體驗下佢嘅神緒。
K:我比較特別,因為我的確係有從Fashion嘅角度去玩Cosplay,加上我自然係讀緊fashion design同merchandiser嘅課程,之後亦會繼續升讀上去。其實Cospla依方面有興趣係因為可以自己整下配件、道俱,但由於啲衫就仲未夠功夫可以自己造到,所以要痳煩深老大幫手(阿深),將來或者會自己整。當然喇,我自己本身都鐘意漫畫,玩Cosply亦有從依個角度出發,唔會話單單只有Fashion嘅態度。
好:我玩Cosplay純粹係想代入個角色,深入咁感受漫畫世界。
深:其實我自己都同Kenny一樣,亦都係從一個Fashion嘅角度出發,只不過現時有啲清高嘅Cosplayer會覺得Cosplay服裝唔係Fashion。對於我自己嚟講,Cosplay甚至可以話係一種玩俱,係一樣俾人去玩嘅嘢,可以令到自己同大家都開心嘅玩具,其實講到底Cosplay服飾依樣咁有特色嘅嘢又點會唔係一種Fashion呢?如果你唔當Cosplay服裝係一種Fashion,咁你會當佢係咩?當佢係地布呀不過嚴格嚟講,你都可以話一係一種戲服嘅。
K:Cosplay服裝裏面都有好多係好華麗、有形嘅服裝,我自己本身亦係比較喜歡依一類,當你著出嚟嘅時候會俾人一種好高貴嘅感覺,好多人會爭住影果種,點能夠話唔係Fashion?
H:我想問下當你去著起件服裝,去Cosplay一個角色嘅時候有咩感覺?係咪好有滿足感?而你認為Cosplay依種活動算唔算係一種戲劇嘅表現?因為佢嘅本質就係去模仿一個角色或、故事嘅情節。
深:我覺得Cosplay算係一種戲劇嘅表現,原意都係去演繹一個你喜歡嘅角色,亦即係所謂嘅角色扮演,同戲劇一樣要清楚了解佢嘅神緒、難忘嘅場面、故事背景等等。事實上,當我著起件衫嘅時候的確有一種莫明嘅滿足感,而當有朋友因為你嘅演繹夠神似而要求同你合照嘅話,亦當然係會更加開心、滿足,係一種對你嘅認同。
數:我都好認同阿深嘅講法,當我去Cos嘅時候我會覺得自己係演繹緊一個角色,我會代入去依套漫畫裏面,依樣嘢的確俾到我滿足感,當你著得好嘅時候,人地自然會搵你影相,亦都會令我覺得好開心。
月:著起Cos服嘅時候,我會覺得好開心,主要係因為可以同一班friend一齊去玩,一齊去演果個漫畫入面唔同嘅角色,當中你會自自然然咁投入演依個角色,會帶出佢嘅性格等等,而影相嘅時候亦會模仿番佢嘅動作,整體嚟講同演戲係無咩分別。
昕:當我著起件衫嘅時候,就等同演繹緊一個角色,演繹得好先至會有滿足感,但係我就唔覺得Cosplay係一種戲劇嘅表現,因為佢唔須要好似一個話劇嘅模式咁去表現自已,只不過單從喜歡一個角色而演繹佢出嚟,始終唔會脫離自然嘅身份,而有人搵我合照我係會開心嘅,原因係基於佢地嘅認同,因為佢地都明白你所演繹緊嘅角色,睇到你所花嘅心思。
S:我覺得Cosplay唔算一種戲劇嘅表現,因為我認為戲劇一定要係一個特定嘅地方、要有Camera man等等,係去演一套完整嘅戲,並唔係單單影相就算,戲劇係要有一連串嘅故事,因此我唔認同Cosplay係戲劇。不過玩Cosplay滿足感一定有嘅,當出得唔似嘅時候亦自然會有失落感。
K:戲劇嘅感覺係會有嘅,因為好多人玩Cosplay嘅時候,都鐘意將漫畫故事入面嘅情影重新演繹出嚟,雖然唔係用Camera嘅形式去攝錄,只係轉咗用硬照嘅形式去表達出嚟﹐講到滿足感當然會係有喇,特別係當有人行埋嚟同你講你演得好似嘅時候,而當你好比心機去造一啲道具、好努力咁去準備一個角色而又無人話你似嘅話,咁就梗有唔開心喇!
當:只知好成功咁演出到一個角色嘅時候會好開心,已經唔會理佢係咪戲劇,只係鐘意玩、覺得好玩咁去做。
好:滿足怠一定有嘅,特別係角色扮得神似嘅時候,有人讚有人認同果種滿足感好難形容,畢竟全部份都係一手一腳去做。其實我自然嚟講,有一半滿足感係拎到件衫嘅時候已經會有,另一半就係出event或者私影嘅時候就會出埋嚟!
Cosplay同好訪問1/3(完)
|
