H:你認為嚟緊嘅日子,Cosplay喺香港嘅發展會係點?會越來越風行,一或會有更多人歧視?其它可能性等等?
月:Cosplay喺香港係會有發展空間,而歧視依樣嘢都已經見怪不怪,所以亦無咩好講,我眼見Cosplay界入面的的確多咗人玩,有好多係新出Cos嘅人。當然,如果你話著住一件Cos衫入商場嘅話,咁當然自己都覺得好礙眼,我層經有咁嘗試過,始終同商場嘅氣氛格格不入。
數:其實我覺得兩樣都有囉!我都認同多咗人出嚟Cos,咁歧視依樣嘢就點都會有,特別係老一輩嘅人會好難接受,例女有一次我著起一套純黑白色嘅女僕服,我婆婆見到之後就好不滿,覺得好似去送殯咁樣,覺得好唔吉利!
昕:歧視依樣嘢就見仁見志喇!有啲人望你唔一定係歧視,可能只一種好奇嘅眼光,甚至可能係欣賞嘅眼光。我覺得或者會好多人唔欣賞依樣玩意,但歧視就唔算太嚴重囉。
翼:我自己本身並唔係Cosplayer,不過每次當我父母見到Cosplay依樣野或者佢啲相嘅時候,都會講一啲唔好聽嘅說話出嚟,例如話佢地唔知做咩!著到鬼五馬六等等。雖然Cosplay依樣嘢係香港已經有好幾年嘅時間,但對於上一輩 嘅人嚟講始終係難於接受,不過佢地接受唔到還接受唔到,但我認為依個風氣會繼續發展落去,每一個年代嘅變更都會有人涵接唔到,咁嘅情況係正常嘅!等於喺以前嘅年代,即使你著得幾Casual幾斯文都好,男仔留長頭髮都會俾人一種飛仔、唔正經嘅形像,同依家情況無咩分別!若果你認為玩Cosplay嘅人都係有問題嘅話,咁係唔正確嘅觀念!
月:我阿妹成日都認為反寸角色嘅Cosplayer都係有易服辟,例如女著男裝或者男著女裝等等,我知好多人都會咁諗。
數:我覺得唔多唔少都牽涉到一啲文化衝突,何如上咗年紀嘅老人家見到有人著日本和服嘅時候,佢地會覺得好唔順眼,可能因為佢地經歷過、體驗過日本嘅侵略,所以真係會好難去接受到日本文化!
好:我覺香港老一輩人嘅思想係比較守舊嘅,當我有時演出一啲日化角色嘅時候,我啲親人都會問我:[當年日本侵華,搞到我地無淡好食,點解你會無一種同仇敵愾嘅感覺?仲咁熱衷去支持佢地、去玩佢地嘅嘢!],我想同大家講唔好咁聞塞喇,依家係廿一世紀,件事都過咗咁耐。另一方面,其實我想有多啲人去接觸Cosplay囉,我記得係四年前嘅漫畫節,當我去到會場嘅時候見到有好多Cosplayer係扮演唔同嘅動漫角色由於我當時並唔係Cosplayer,咁當然係有彈無讚喇!不斷彈啲Cosplayer扮得一啲都唔似,不過當自己玩落Cosplay之後就發覺,要做到同原著全完一模一樣真係好唔容易,你要花好多時間、心機去了解個角色,甚至花時間資源去造衫同道具去配合個角色。近幾年Cosplay的確係多咗人玩,不過多咗人加入事非自然會多,我希望係將來日子會有更多有心玩Cosplay嘅人加入囉,而唔係越來越多衣架人囉(全為著一套靚嘅角色服裝、戲服而玩Cosplay嘅人,基本連套漫畫、動畫都無睇過,亦唔會探究角色嘅神緒!)。
翼:我想補充,外間好多無玩過Cosplay嘅人,會覺得玩Cosplay係一件唔好嘅事,佢地根本無認真諗清楚,而家啲人成日話年青人淨係識打機又無創意,其實Cosplay正正係一個好嘅興趣去令佢地動腦筋,例如由頭到尾諗下點樣設計、親手造一啲戲服同道具出嚟,一切都要一手包辦,無形中刺激番年青人嘅創作力、創造力!起碼會多咗機會令佢地諗嘢,至少聯想到將自己鐘意嘅動漫、電子遊戲角色現實化已經係一個好好嘅嘗試!我成日都有一句口頭禪,就係:[你有你打機、我有我玩Cosplay!]
深:我諗我會比較熟悉依個主題,因為我自己現時都係做緊一啲有關Ｃosplay服裝、道具製作嘅事業,因為我認為依個市場係有前影嘅,雖然依家香港嘅Cosplayer為數只有大概三萬個,可能你會覺整個市場只有做依三萬人生意,但事實上玩Ｃosplay嘅人數係不斷增加,我個人認為Ｃosplay依家係掘起緊嘅!可能前幾年你見到動漫展都歡迎Ｃosplayer到場活動,但依年大會已經開始對Cosplayer反感,原因係因為佢地為數太多,認為佢地會阻塞會場通道等等!好似阿翼咁講,可能有好多人認為玩Cosplay係壞嘅、唔好嘅!但我就持另一個態度去睇,而家成日話關注御宅族或者NHK(隱蔽青年),但有無諗過Cosplay依個玩意係其中一個途徑帶佢地走番出現實世界呢?用佢地日夜對住嘅電腦遊戲、動漫角色去引導佢認識外面嘅朋友。玩Cosplay其中一個最好嘅地方就係可以識好多朋友,即使大家初時唔認識,但只要肯友善咁打個招呼、影下相就可以打開話題,隨之自然成為朋友。然而,我自己本身亦都好希望可以推動Cosplay依個活動,正如我係上年嘅漫畫節設立咗一個Cosplay服裝租借嘅檔攤,雖然有好多玩Cosplay嘅人對我咁嘅行徑不滿,因為佢地覺得咁做會培養更多衣架人嘅出現!當然,我概然開設得依個檔攤話唔想有利潤就假嘅,但其實喺另一個角度睇,我更深層嘅原意只係希望可以推廣到依個玩意,令更多人可以分享到玩Cosplay所帶來嘅喜悅,你要知道當你第一次見到Cosplay之後,即刻搵人去做套Cosplay服去參與係一件好難嘅事,係須要好大勇氣而且好少人會咁做,而Cosplay服租借正正係一個好嘅途徑去令佢地行第一步,試下著起件Cosplay服去玩依樣野,方法去開一條路俾人去嘗試,試下同人影相去感受果種氣氛。喺最後我證明咗我依一個諗法係成功嘅,因為你見到今日坐係到嘅Sunny、昕,佢地都係我喺開 Cosplay租借攤檔嘅時候識番嚟,時至今日計番起上嚟都已經認識咗有一年嘅時間,除咗而且已經成為咗一個資深嘅Cosplayer,私底下亦成為咗好朋友,所以我認為Cosplay依樣野除咗係有前景之外,亦同時係一個正面嘅活動。
Cosplay同好訪問2/3(完) |
